Халқ депутатлари Қува туман Кенгашидаги депутатимиз Облоберди Олимов туманнинг “Олтинариқ” маҳалласида жойлашган 20 умумий ўрта таълим мактабининг куз-қиш мавсумига тайёргарлигини кўздан кечирган эди. Ўрганишлар натижасида бир қатор муаммо ва камчиликлар аниқланди. Жумладан:

Мактабдаги 4 та иситиш қозонининг иккитаси маънан эскириб, фойдаланишга яроқсиз ҳолга келиб қолган. Қолган иккита иситиш қозони эса ўтган йилги мавсумда ишдан чиққан. Шундай қилиб, мактабда иситиш тизими ишдан чиққан, деган хулосага келинган. Бундан ташқари мактабнинг том қисми ҳам таъмир талаб ҳолатга келиб қолгани айтилган.

Юқоридагилардан келиб чиқиб, депутат Қува туман ҳокимининг иқтисодиёт ва тадбиркорлик масалалари бўйича биринчи ўринбосари Ж.Зокировга мазкур муаммоларни бартараф этишда амалий ёрдам сўраб депутат сўрови юборилган эди.

Масъулнинг жавоб хатида келтирилишича, ҳозирда мактабни куз-қиш мавсумига тайёрлаш учун тегишли мутасаддилар томонидан зарур таҳлил ишлари олиб борилмоқда. Бунда мактабнинг иситиш тизимига доир камчиликларни бартараф етиш ҳамда моддий техника базасини мустаҳкамлаш чора-тадбирлари белгиланмоқда.