Халқ депутатлари Қашқадарё вилояти Кенгаши депутати С. Камилова томонидан юборилган депутатлик сўровига Қашқадарё вилояти Транспорт бошқармаси бошлиғи Б. Язданов томонидан жавоб берилди.
Депутатлик сўровида Қарши шаҳридаги вилоят “Она ва бола” шифохонаси олдида, шунингдек, 7 ва 16-автобус йўналишларида автобус бекатларини қуриш ҳамда бу борада кўрилаётган чоралар юзасидан масалалар кўтарилган.
Жавобда Қарши шаҳрида 35 та оралиқ ҳамда 5 та бошланғич ва якуний автобус бекатларини қуриш ва жиҳозлаш учун 1 миллиард сўм маблағ ажратилгани маълум қилинган. Мазкур маблағ бекатлар қурилиши учун Қарши шаҳар Ободонлаштириш бошқармасига йўналтирилган.
Ҳозирда янги бекатларни қуриш бўйича лойиҳа-смета ҳужжатлари ишлаб чиқилиб, экспертиза хулосасини олиш учун тақдим этилган. Экспертиза хулосаси олингач, белгиланган тартибда қурилиш ишларини ташкил этиш режалаштирилган.
Шунингдек, 2026 йилда қурилиши режалаштирилган янги автобус бекатларининг аниқ манзиллари белгиланган. Жумладан, Алишер Навоий, Денов, Ҳасаф ва Мустақиллик кўчаларидаги аҳоли гавжум ҳудудлар, “Она ва бола” маркази, Вилоят болалар шифохонаси, Деҳқон бозори, Давлат хизматлари маркази ҳамда ОИТС маркази олдида янги автобус бекатларини қуриш ва жиҳозлаш кўзда тутилган.