Bugun Yangi O‘zbekistonimizda mustaqilligimizning o‘ttiz to‘rt yillik bayrami katta shod-u xurramlik bilan kutib olinmoqda. Zero, bu qutlug‘ ayyom - yangi tariximizdagi eng ulug‘, eng aziz sana. Bu xalqimizning ko‘p ming yillik tarixida buyuk voqeadir. O‘tgan yillarda erishilgan yutuq va marralar zamirida bu bebaho ne’matning qadr-qimmati namoyon.
Shuning uchun ham Mustaqillik bayramini katta tayyorgarlik bilan kutib olish biz uchun ezgu an’anaga aylanib qolgan. Chunki bu bayram butun millat va xalq taqdiri bilan bog‘liqdir. Bayram arafasida bosib o‘tgan yo‘limiz, amalga oshirgan ishlarimizni sarhisob qilib, bugungi zafarlarimizni ko‘z o‘ngimizdan o‘tkazishimiz tabiiy.
Shular haqida o‘ylaganimda ayrim voqealar tez-tez xayolimda charx uradi. O‘shanda dekabr oyi edi. Qor yoqqan, dalalar oppoq. Tong yorishib ulgurmasdan hammani dalaga olib chiqishdi. Erkaklar oldinda yurib, katta yog‘och bilan g‘o‘zalardan qorni qoqishar, ayollar, qizlar esa muzlab qolgan paxta qoldiqlarini ne mashaqqatlar bilan terib olardi. Qishloq xo‘jaligida, ayniqsa, paxta terimida bolalar va ayollar ham majburiy ravishda ishlatilardi. Do‘konlarda go‘sht, shakar, yog‘, kiyim-kechak kabi mahsulotlar doimiy tanqislikda bo‘lardi.
Umuman, inson, uning qadri, huquqi, ma’naviy, milliy qadriyatlari so‘nggi o‘rinda turar edi. Aholining ko‘p qismi qishloq xo‘jaligiga bog‘langan, lekin moddiy sharoit zaif edi.
Xalqimiz mustaqillikdan oldin ana shunday og‘ir kunlarni boshidan kechirdi. Afsuski, bunday iztirobli, ayanchli holatlarga misollar ko‘p edi. Hozir biz ana shu davrlar haqida farzandlarimizga, nevaralarimizga gapirib bersak, ertak eshitgandek bo‘lishadi. Ammo bularning barchasi haqiqat, biz boshimizdan kechirgan qiyin kunlar edi.
Mustaqillik yillarida xalqimiz haqiqiy qadr-qimmat topdi. Bundan 34 yil avval boshlangan yangi tarix yuz yillik sinovlarning tugashi va yangi hayot boshlanishining ramzi bo‘ldi.
Shular haqida ko‘p o‘ylayman. Ayniqsa, Mustaqillik bayrami arafasida yutuq va zafarlarimizni ko‘rib, qaddimiz tiklangan, qadrimiz yuksalgan ana shunday davrlar uchun ming-ming shukrona aytaman. Mustaqillik yillari davomida barcha jabhalarda, jumladan, ta’lim-tarbiya, ilm-fan, madaniyat va san’at, sog‘liqni saqlash, sport, ijtimoiy, iqtisodiy, ma’naviyat sohalarida, turmush tarzimiz mazmunida tub o‘zgarishlar amalga oshirildi. Ruhiyatimiz, qadriyat va urf-odatlarimiz e’zoz topdi, inson huquqlari va fuqarolik jamiyatiga e’tibor oshdi.
Muhim yutuqlarimizdan yana biri bu - erkinlik va ochiqlik, qonun ustuvorligi, jahon hamjamiyati bilan o‘zaro manfaatli hamkorlik davlatimiz siyosatining asosiy yo‘nalishiga aylandi. “Yangi O‘zbekiston – ijtimoiy davlat” degan tamoyil Konstitutsiya darajasida mustahkamlandi.
Oxirgi sakkiz yilda davlat budjetidan ta’lim va tibbiyot sohaciga ajratilgan mablag‘lar sezilarli darajada ko‘paydi. Aytaylik, 2016-yilda maktabgacha ta’lim qamrovi 27 foiz bo‘lgan. 2025-yilga kelib, bu raqam 76 foizga yetdi. Oliy ta’limga qamrov 42 foizga yetdi.
2017-yilda kam ta’minlangan 500 ming oila ijtimoiy yordam olgan bo‘lsa, bugunga kelib 2 milliondan ortiq oilaga ko‘mak berilmoqda. Ajratilayotgan mablag‘ esa 7 barobar ko‘paytirilib, yiliga 11 trillion so‘mga yetdi.
Kam ta’minlangan oilalarni aniqlash va ularga manzilli yordam ko‘rsatish maqsadida “Ijtimoiy himoya yagona reyestri” axborot tizimi joriy qilindi, kam ta’minlangan nafaqa oluvchi oilalar soni oxirgi uch yilda to‘rt barobar oshib, 1,9 millionga yetdi.
Inson qadri yuksalgan yurtga munosib bo‘lib, yutuqlarimizni asrab-avaylash, yangidan- yangi marralarni zabt etish barchamizning sharafli burchimizdir.
Yurtdoshlarimni biz uchun qimmatli bo‘lgan Mustaqilligimiz bayrami bilan tabriklayman! Mustaqillik – bu erkinlik, faxr va kelajakka ishonch ramzi. Mustaqilligimizning 34 yilligi muborak bo‘lsin!
Olim RAVSHANOV,
O‘zXDP Qashqadaryo viloyat kengashi raisi,
xalq deputatlari viloyat Kengashidagi partiya guruhi rahbari.
«O‘zbekiston ovozi», 27.8.2025, №34