Мустақиллигимизнинг 35 йиллиги арафасида 852 нафар шахснинг афв этилиши мамлакатимизда инсон қадри ва инсонпарварлик тамойиллари давлат сиёсатининг муҳим йўналишларидан бири эканини яна бир бор кўрсатди. Афв — қонун устуворлигини инкор этиш эмас, балки қилмишига чин кўнгилдан пушаймон бўлган ва тузалиш йўлига қатъий ўтган инсонга ҳаётини қайтадан бошлаш учун имконият беришдир.

Фармонга мувофиқ, 604 нафар шахс жазодан тўлиқ озод этилади, 115 нафари муддатидан илгари шартли озод қилинади, 52 нафарининг жазоси енгилроқ жазога алмаштирилади, 81 нафарининг эса озодликдан маҳрум қилиш жазоси муддати қисқартирилади. Бу рақамлар ортида нафақат 852 нафар инсоннинг тақдири, балки уларнинг оилалари, фарзандлари ва яқинлари тақдири ҳам турганини ҳис этиш муҳим.

Афв этилганлар орасида 375 нафар ёш, 49 нафар аёл, 60 ёшдан ошган 37 нафар эркак ва 7 нафар хориж фуқароси борлиги, шунингдек, тақиқланган ташкилотлар фаолиятида иштирок этган 63 нафар шахсга ҳам инсонпарварлик тамойили асосида имконият берилгани фармоннинг кенг қамровини кўрсатади. Энг муҳими, бу инсонларга берилган ишонч уларнинг хатосидан хулоса чиқариб, жамиятга фойдали инсон сифатида қайтиши учун масъулият ҳам юклайди.

Эндиликда асосий вазифа — афв этилганларнинг ижтимоий ҳаётга мослашишига кўмаклашиш, уларнинг меҳнат қилиши, касб-ҳунар эгаллаши ва жамиятда муносиб ўрин топиши учун шароит яратишдир. Бу жараёнда маҳалла, жамоатчилик, масъул идоралар билан бир қаторда депутатлар ҳам фаол иштирок этиши керак. Зеро, инсонга иккинчи имконият бериш — эзгуликнинг бошланиши, унинг ишончни оқлаши эса ана шу имкониятнинг ҳақиқий натижасидир.

Қизилгул Қосимова,

Олий Мажлис Қонунчилик палатаси депутати,

ЎзХДП фракцияси аъзоси.