Ўзбекистон Халқ демократик партияси аҳолини ижтимоий қўллаб-қувватлаш, уларга муносиб турмуш шароитларини яратишни ўзининг устувор мақсадларидан бири, деб билади. Шу мақсадда партия ҳар бир йўналишда, ҳудудлар кесимида мунтазам ўрганишлар, таҳлиллар олиб боради.

Ўтган бир ой давомида партиямиз масъуллари ва фаолларидан иборат ишчи гуруҳ республикамизнинг 5 та ҳудудида ишлаб чиқарилаётган ош тузининг йодланганлик даражаси ва ишлаб чиқариш стандартларига қанчалик амал қилинаётгани бўйича ўрганиш олиб борди. Бугун Марказий Кенгаш мажлислар залида олиб борилган ўрганишлар таҳлили бўйича йиғилиш ўтказилди.

Ўрганишларда маълум бўлишича, ҳудудлардаги айрим ишлаб чиқарувчилар йодлаштириш талабларига тўлиқ амал қилмаётгани аниқланган. Масалан, Сурхондарё вилоятидаги “Хўжаикон туз” МЧЖда ош тузи тегирмонда майдаланиб эланмасдан йодлаш ускунасига ўтказилаётгани, қолаверса, ишчилар учун етарлича шароит яратилмагани аниқланган.

Бундан ташқари, “Чорбоғ Баракали Туз” МЧЖ қурилиш ишлари битказилмаган, том қисми очиқ, ҳаво айланиш қурилмалари ўрнатилмаган, чанг ушлаб қолувчи ускуналар уланмаган биноларда туз ишлаб чиқараётгани маълум бўлган.

Йиғилишда йод танқислиги оқибатида инсонда кузатиладиган физиологик ўзгаришлар жуда хавфли экани, бу миллат генофондига ҳам таъсир қилиши мумкинлиги таъкидланди. Олиб борилган ўрганишлар натижасида жамоатчилик эшитувини ташкил этишга қарор қилишди.