Яқинда халқ депутатлари Пискент туман Кенгашидаги депутатлик гуруҳимиз туманнинг ичимлик суви ва оқова сув тизимини ўрганиб, уни такомиллаштириш масаласини туман Кенгаши сессиясига киритди.

Ўрганиш натижаларига кўра, туманда 20 мингга яқин хонадон мавжуд бўлиб, уларда 100 минг нафарга яқин аҳоли истиқомат қилади. Аҳолининг 71,1 фоизи ичимлик суви билан таъмирланган. Режага кўра, бу кўрсаткич 90 фоизга етказилиши мақсад қилинган.

Туманда 223 км ичимлик суви тармоқлари мавжуд бўлиб, шундан 16 километри таъмирга муҳтож ҳолатда.

Туман Халқ қабулхонасига келиб тушган мурожаатлар таҳлили уларнинг катта қисми айнан ичимлик сувининг тез-тез узилиб туриши, бу борадаги мурожаатлар масъуллар томонидан вақтида кўриб чиқилмаслиги, яроқсиз ҳолга келиб қолган қувурларнинг йиллар давомида таъмирланмаслиги билан боғлиқ эканлигини кўрсатди.

Депутатларимиз сувга бўлган талаб ва эҳтиёж ҳар қачонгидан ортиб бораётган бир шароитда кўп ҳолларда сув беҳуда йўқотилаётганини қаттиқ танқид қилишди. Истеъмолнинг аниқ ҳисоби йўқ, айрим насослар, соҳа корхоналарига тегишли махсус техникалар эскирганлиги қайд этилди.

Ичимлик суви билан боғлиқ муҳокамалар узоқ давом этди. Шу боис бу масалага алоҳида эътибор қаратилиб, манзилли лойиҳаларни амалга ошириш бўйича таклифлар билдирилди. Сув масаласи устувор аҳамият касб этаётган экан, уни исроф қилмасликни тарғиб қилиш ишларини кучайтириш кераклиги айтилди. Сув таъминоти даражаси паст ҳудудларга алоҳида эътибор қаратиш зарурлиги таъкидланди.

Сессия якунда муҳим қарорлар қабул қилди.

Дилбар КОМИЛОВА,

ЎзХДП Пискент туман кенгаши раиси.

«Ўзбекистон овози», 13.8.2025, №32