Bugungi globallashuv va raqamlashtirish jarayoni tarixan shakllangan davlatchilik an’analari hamda davlatlarning boshqaruv tizimiga yangi realliklar, zamonaviy tendensiyalar olib kirayotganiga guvoh bo‘lyapmiz.
Natijada demokratik jamiyatlarda birinchi navbatda byurokratiyadan voz kechish tendensiyasi jadallashib ketdi. Byurokratiya – faqat qog‘ozbozlik emas, balki fuqarolarning davlatga bo‘lgan ishonchiga, iqtisodiy samaradorlikka, shuningdek, umumiy ijtimoiy kayfiyatga bevosita ta’sir ko‘rsatadigan omildir.
Shu sababdan, O‘zbekiston Prezidenti Xalqaro kongress markazida byurokratiyani bartaraf etish masalalariga bag‘ishlangan xalqaro forumdagi nutqida – Biz Yangi O‘zbekistonni barpo etishda “Xalq davlat idoralariga emas, davlat idoralari xalqimizga xizmat qilishi kerak” degan insonparvar g‘oyaga amal qilyapmiz, – dedi.
Ochig‘ini aytish kerak, bundan o‘n yil oldin fuqarolarimiz hujjat ko‘tarib davlat idoralari orasida sarson bo‘lardi. Hech bir ishimiz silliq bitmas edi.
Keyingi yillarda mamlakatimizda byurokratiyani qisqartirish yo‘lida bir qator farmon va qaror qabul qilindi. Davlat xizmatlari markazlari, Yagona portal platformasi, “Raqamli hukumat” kabi tizimlar tashkil etildi. Natijada ko‘rsatilayotgan xizmatlar turi bugungi kunda 1 ming 40 taga yetdi. 90 dan ortiq xizmatlarni proaktiv va kompozit shaklda ko‘rsatish yo‘lga qo‘yildi. Bunda tug‘ilish bilan bog‘liq xizmatlarning kompozit shaklda ko‘rsatilishi odamlarga katta qulaylik yaratmoqda.
Xalq demokratik partiyasi elektorati bo‘lgan aholining ehtiyojmand qatlamlariga ijtimoiy nafaqalar murojaatlarisiz avtomatik tarzda amalga oshirilmoqda.
Raqamlashtirish natijasida 30 turdagi xizmatlarni real vaqt rejimida olish imkoniyati yaratilib, joriy yilning o‘zida 8 millionga yaqin xizmatlar avtomatik ravishda ko‘rsatilgan. Bu odamlar hech bir tashkilotning eshigini taqillatmasdan, uyida yoki kundalik mashg‘ulotidan ajralmasdan o‘ziga kerak xizmatdan foydalanayotganini anglatadi.
Davlat rahbari “Byurokratiyani bartaraf etish – 2030” dasturini tasdiqlab, unda eng avvalo, davlat va aholi, davlat va biznes hamda davlat tuzilmasining ichki munosabatlarida byurokratiyani bartaraf etish, har tomonlama qulay davlat xizmatlari ekotizimini yaratish ko‘zlanganini aytib o‘tdi.
Jumladan, davlat xizmatlari soni 1,5 mingtaga, elektron xizmatlar ulushi 95 foizga yetkaziladi. Kelgusi yilning o‘zida 250 ta xizmatlar elektron shaklga o‘tkaziladi. Proaktiv va kompozit xizmatlarning soni 400 taga yetkaziladi. Kelgusi yilning o‘zida 180 turdagi bunday xizmatlar joriy etiladi.
Hujjat aholining davlat xizmatlaridan tez va qulay foydalanishi, tadbirkorlikni rag‘batlantirish, mamlakatning xorijiy investitsiyalar uchun jozibadorligini oshirish, raqamli boshqaruv va davlat boshqaruvi sohalarida mamlakatimizning xalqaro maydondagi ijobiy imijini shakllantirishga xizmat qiladi.
Bu jarayonlarning shaffofligini oshirib, odamlarni ortiqcha ovoragarchilik va hujjatbozlikdan xalos etishi bilan birga, ularning davlatga bo‘lgan ishonchining yanada mustahkamlanishiga asos bo‘ladi.
O‘zbekiston Xalq demokratik partiyasi va uning Qonunchilik palatasidagi fraksiyasi mazkur dasturni to‘liq qo‘llab-quvvatlaydi. Partiyamizning asosiy maqsadi aholining ehtiyojmand qatlami manfaatlarini himoya qilish, fuqarolarga teng va adolatli imkoniyatlar yaratishdan iborat. Davlat xizmatlarining qulay, shaffof va barcha qatlam uchun birdek ochiq bo‘lishi – adolatli ijtimoiy siyosatning ajralmas qismi hisoblanadi.
Ulug‘bek INOYATOV,
Oliy Majlis Qonunchilik palatasidagi
O‘zXDP fraksiyasi rahbari.