Бугунги кунда Ўзбекистонда сув ресурсларини тежаш ва улардан оқилона фойдаланиш масаласи стратегик аҳамият касб этмоқда. Аҳоли сонининг ўсиши, саноатлашув жараёнлари ҳамда иқлим ўзгариши ичимлик сувига бўлган талабнинг ошиши муқобил сув манбаларидан фойдаланиш ҳаётий заруратга айлантирмоқда.

Халқ депутатлари Тошкент вилоят Кенгашидаги депутатимиз Муҳсиддин Низомиддинов ташаббуси билан Паркент тумани “Файзобод” маҳалласида ёмғир сувини йиғиш ва ундан самарали фойдаланишга қаратилган синов лойиҳа амалга оширилмоқда.

Бунда ёмғир сувидан қайта фойдаланиш кўзда тутилиб, намунавий хонадонга 4 тонналик махсус сув сиғимлари ўрнатилган. Ушбу тизим орқали йиғилган ёмғир суви ўртача бир ҳафта давомида хонадоннинг кундалик техник эҳтиёжларини қопламоқда. Хусусан, сув қўл ювиш, автомобиль ювиш, ҳовли тозалаш каби маиший ишларда кенг қўлланилмоқда.

Депутатнинг фикрича, ёмғир сувини йиғиш тизимини хонадонларда жорий қилиш ичимлик сувини тежашда катта роль ўйнайди. Статистик маълумотларга кўра, 100 та хонадонда ушбу тизим жорий этиш орқали ойига 1200-1500 тоннагача ичимлик сувини тежаш мумкин.