Тошкент шаҳрида Ўзбекистон Халқ демократик партияси вакилларидан иборат ишчи гуруҳ томонидан онкология соҳасидаги долзарб масалалар, хусусан, аёллар ўртасида маммографик скринингни ташкил этиш, унинг сифати ва самарадорлигини ошириш масалалари ўрганилмоқда.

Ишчи гуруҳ таркибига Олий Мажлис Қонунчилик палатаси депутатлари, шунингдек, халқ депутатлари шаҳар ва туман Кенгашлари депутатлари киритилган. Фаолият доирасида Ўзбекистон Республикаси Президентининг 2024 йил 22 ноябрдаги ПҚ-402-сон қарори ижросининг амалдаги ҳолати таҳлил қилиниб, онкологик касалликларни эрта аниқлаш тизимини такомиллаштиришга қаратилган чора-тадбирларнинг бажарилишига алоҳида эътибор қаратилди.

Ўрганишлар жараёнида тиббиёт муассасаларининг маммографик ускуналар билан таъминланганлик даражаси, малакали кадрлар билан таъминлаш масалалари, беморларни скринингдан диагностика ва даволаш босқичларига йўналтириш тизими чуқур таҳлил қилинди. Шунингдек, аҳолининг, айниқса, мақсадли ёш гуруҳидаги аёлларнинг профилактик текширувлардан ўтиш зарурати бўйича хабардорлик даражаси ва скрининг дастурларида мунтазам иштироки масалалари муҳокама қилинди.