Партиямиз Самарқанд вилоят кенгаши ташаббуси билан Самарқанд педагогика институти ҳамда Ўзбекистон Ногиронлар жамияти вилоят бўлими ҳамкорликда имконияти чекланган шахслар учун ихтисослаштирилган махсус техникумда “Бир-биримизни қўллаб-қувватлайлик” лойиҳаси доирасида маънавий-маърифий тадбир ўтказилди.

Тадбирнинг мақсади — ногиронлиги бўлган шахсларнинг жамиятда фаол иштирокини таъминлаш, уларнинг ижтимоий ҳаётга интеграциясини рағбатлантиришдан иборат.

Ташкилотчилар, ОАВ ходимлари ва меҳмонлар махсус техникумда талабалар учун яратилган шароитлар билан танишди. Қайд этиш керакки, дарс хоналар замонавий ахборот технологиялари билан тўлиқ жиҳозланган, ишлаб чиқариш устахоналари ва қизлар учун бичиш-тикиш, зардўзлик тўгараклари ташкил этилган.

– Қизларимиз тиккан зардўзлик ҳамда каштадўзлик маҳсулотларига харидор кўп. Уларни кўрган кишининг ҳаваси келади. Биз, албатта, қизларимизга касб-ҳунар ўргатаётганимиздан фахрланамиз. Бунинг учун улар ҳам биздан мамнун, – дейди техникум зардўзлик гуруҳи раҳбари Мамлакат Мирсаидова.

Шунингдек, тадбирда сўзга чиққан техникум талабалари Маржона Ихтиёрова ва Фотима Қаршиевалар тадбир ташкилотчиларига бундай учрашувлар улар учун жуда муҳимлигини, тадбирдан ўзига хос мотивация олганликларини, кўрсатилган эътибор ва меҳр учун миннатдорлик билдиришди.