Ўзбекистон Халқ демократик партияси ўз дастурий мақсадларида аҳолининг ижтимоий эҳтиёжларини таъминлаш, маҳаллаларда болалар, ёшлар ва кексалар учун қулай муҳит яратишни ўз олдига аниқ вазифа қилиб қўйган.

Шу асосда партиянинг Тошкент шаҳар Кенгаши ташаббуси билан партия вакиллари ҳамда депутатлардан иборат ишчи гуруҳ тузилиб, пойтахтимизнинг Яшнобод, Миробод, Шайхонтоҳур, Чилонзор ва Янгиҳаёт туманларидаги 40 га яқин маҳаллада болалар майдончалари ва спорт иншоотларининг бугунги ҳолати манзилли ўрганилди.

Аниқланган муаммоларни тез ва самарали бартараф этиш учун масъул идораларнинг вакиллари иштирокида Тошкент шаҳар кенгашида жамоатчилик эшитуви ўтказилди.

Ўрганишларда маҳаллалардаги реал ҳолат юзасидан аҳолидан олинган таклиф ва мурожаатлар, таҳлилий маълумотлар эшитувда очиқ-ойдин муҳокама этилди.

Қувонарли натижалар бор, лекин айрим маҳаллаларида болалар майдончалари ва спорт иншоотлари қониқарсиз аҳволда. Шунингдек, нуронийлар учун мўлжалланган дам олиш ва соғломлаштириш жойларининг ҳам таъмирталаб ҳолатларига гувоҳ бўлинди. Айрим маҳаллаларда бундай масканлар мавжуд эмас.

Ўзбекистон Халқ демократик партияси бу ҳолатларни жамоатчилик, депутатлик назоратининг муҳим йўналиши сифатида қабул қилмоқда. Ўрганиш бўлгандан кейин мутасаддиларда масъулият, амалий натижа чиқиши учун интилади.

Чилонзор, Миробод ва Янгиҳаёт туман Кенгашидаги партиямиз депутатлари томонидан тегишли мутасадди идораларга депутатлик сўровлари юборилган. Уларда болалар майдончаларини таъмирлаш, ёритиш тизимини яратиш, санитария талабларига мос ҳолатни таъминлаш, янги спорт майдонларини қуриш ва мавжудларини реконструкция қилиш бўйича аниқ таклифлар берилган.

Эшитувда аҳоли вакиллари масъул мутасаддиларга саволлар бериб, ўз таклиф ва фикр-мулоҳазаларини эркин билдиришди.

Ўзбекистон Халқ демократик партияси бундай жамоатчилик эшитувларини доимий ўтказиш жамоатчилик назоратининг муҳим йўналиши, деб билади.

Эшитув давомида билдирилаётган фикр ва таклифлар амалий чора-тадбирлар режасига киритилади ва уларнинг ижроси бевосита партиямиз Тошкент шаҳар кенгаши, депутатлар назоратига олинади.